Элӗк муниципаллӑ округӗнче пурӑнакан пӗр хӗрарӑм кӗвӗҫнипе тепӗр хӗрарӑмӑн сутана шӑммине хуҫса янӑ.
Пӗлтӗрхи ҫӗртме уйӑхӗн 23-мӗшӗнче Мӑн Этмен ялӗнчи 60 ҫулти хӗрарӑм хӑйӗн пахчинче пӗр ялта пурӑнакан хӗрарӑмпа вӑрҫма тапранса кайнӑ. Вӑл ӑна икӗ хутран кая мар урапа тапнӑ. Икӗ хӗрарӑм хушшинчи ӑнланмалӑх кӗвӗҫӳпе ҫыхӑннӑ иккен. 60 ҫулти кӗвӗҫ хӗрарӑм кайран йывӑҫ патак ярса илсе икӗ хутран кая мар ҫапнӑ. Шар курнин сутана шӑмми хуҫӑлнӑ.
Пӑтӑрмах пуҫиле ӗҫ пуҫарнипе вӗҫленнӗ. Судра хӗрарӑм хӗненине йышӑнман, вӑл хӑй ӳкрӗ тесе суйнӑ.
Ҫапӑҫакан хӗрарӑма суд тӗрмене хупса хумасӑр 1 ҫул та 6 уйӑхлӑха ирӗкрен хӑтарма йышӑннӑ, сӑнав вӑхӑтне ҫулталӑклӑха палӑртнӑ.
Муркаш муниципаллӑ округӗнчи Мӑрсакасси ялӗнчи 24 ҫулти каччӑна 9 ҫул ҫурӑлӑха ҫирӗп режимлӑ колоние ӑсатма йышӑннӑ.
Аса илтерер: Мӑрсакасси каччи виҫӗ ҫынна вӗлерессипе хӑратнӑ, вӗсенчен укҫа тапӑннӑ. Кӑҫалхи пуш уйӑхӗнче вара вӑл 56-ри арҫынна килне кайса хӗнесе пӗтернӗ, Унтан ӑна ятарлӑ шӗвекпе сапнӑ та вӗлерессипе хӑратса чӗртсе янӑ. Ҫу уйӑхӗн 27-мӗшӗнче каччӑ каллех ҫав арҫын патне пырса кӗнӗ. Хытах хӗнесе пӗтернӗ хыҫҫӑн шар курни вилнӗ.
Пуҫтах ҫав каччӑ пӗлтӗрхи пуш уйӑхӗнче тепӗр ҫынна хӑратса унтан укҫа тапӑнса пурӑннӑ, хӗненӗ. Лешӗ ӑна пурӗ 30 пин тенкӗ панӑ. Кунсӑр пуҫне каччӑ тепӗр ҫынна хӗненӗ.
Елчӗк тӑрӑхӗнчи пӗр ялта пурӑнакан хӗрарӑм ашшӗпе килӗштерсех пурӑнман. Пӗлтӗрхи раштав уйӑхӗн 28-мӗшӗнче иккӗшӗ хирӗҫсе кайсан вӑл ӑна, 60 ҫулти арҫынна, пӗрре питӗнчен чышкӑпа ҫапнӑ, унтан пуҫне каяш витри тӑхӑнтартса лартнӑ.
37 ҫулти хӗрарӑм тӗлӗшпе пуҫиле ӗҫ пуҫарнӑ. Ӑна унччен те ашшӗне хӗненӗшӗн айӑпланӑ. Ҫавӑнпа хальхинче ӑна РФ Пуҫиле кодексӗн 1116-мӗш статйин 1-мӗш пайӗпе явап тыттарма йышӑннӑ. Ӗҫе судра пӑхса тухӗҫ.
Шупашкарта пурӑнакан арҫын ӗҫсӗрлӗх пособине суйса илсе тӑнӑ.
Хулари Мускав районӗн прокуратури тӗрӗслев ирттернӗ те, 2021 ҫулхи авӑн уйӑхӗнче Ӗҫпе тивӗҫтерекен центрта регистрациленнӗ арҫын ӗҫе вырнаҫсан та пособи илсе тӑнине палӑртнӑ. Ҫавӑн пек майпа вӑл 2021 ҫулхи чӳк уйӑхӗнчен пуҫласа 2022 ҫулхи пуш уйӑхӗччен укҫа илсе пурӑннӑ.
Халӗ арҫын тӗлӗшпе РФ Пуҫиле кодексӗн 159.2 статйин 1-мӗш пайӗпе пуҫиле ӗҫ пуҫарнӑ.
Канашри транспортпа энергетика техникумӗнче ӗҫленӗ хӗрарӑма пуҫиле майпа япва тыттарнӑ. Вӑл вӗренӳ заведенийӗн общежитийӗн техникумӗнче комендант пулса тӑрӑшнӑ. Хӗрарӑм пысӑк виҫепе сӗтев илнӗ. Ҫавӑншӑн ун тӗлӗшпе РФ Пуҫиле кодексӗн 290-мӗш статйин 5-мӗш «в» пайӗпе пуҫиле ӗҫ пуҫарнӑ.
Судра палӑртнӑ тӑрӑх, комендант учреждени валли кирлӗ тавар туянма заявкӑсем йӗркелессишӗн 2019 ҫулхи утӑ уйӑхӗччен пуҫласа 2022 ҫӳлхи раштав уйӑхӗччен яваплӑ пулнӑ. Ҫав вӑхӑтра вӑл коммерци организацийӗсенчен пӗрин ертӳҫинчен 300 пин тенкӗ ытла сӗтев илнӗ, ҫавна май тавара унран туяннӑ.
Хӗрарӑма тӗрмене хупса хумасӑр 2 ҫуллӑха ирӗкрен хӑтарма йышӑннӑ. Сӑнав вӑхӑтне 2 ҫул тесе палӑртнӑ.
Шупашкар хулинчи шкулсенчен пӗрне чӗртсе яма хӑтланнӑ учителе СИЗОна 2 уйӑхлӑха хупса хунӑ. Ӑна РФ Пуҫиле кодексӗн икӗ статйипе айӑпласшӑн: терроризм акчӗшӗн тата ҫаратнӑшӑн. Ӑна 20 ҫул таран ирӗкрен хӑтарма пултарӗҫ.
Аса илтерер: пӑтӑрмах кӑрлач уйӑхӗн 28-мӗшӗнче пулса иртнӗ. Шупашкарти 10-мӗш шкулта вӗрентекен 46 ҫулти хӗрарӑм икӗ класа ҫунтарса яма тӑнӑ. Анчах ӗҫе вӗҫлеме хуралҫӑ ссчӗвлӗ пулни кансӗрленӗ.
Хӗрарӑм ӗнентернӗ тӑрӑх, вӑл Раҫҫейӗн хӑрушсӑрлӑх службипе ҫыхӑну тытатӑп, вӗсем мӗн хушнине тӑватӑп тесе шухӑшланӑ имӗш. Хӗрарӑма кӑрлач уйӑхӗн 30-мӗшӗнче ӗҫрен кӑларнӑ.
Шупашкар хулинче пурӑнакан пӗр арҫын хӑйӗн пӗлӗшне хӗнесе вӗлернӗ. Пӑтӑрмах кӑрлач уйӑхӗн 25-мӗшӗнчи ҫӗрле пулса иртнӗ.
38 ҫулти арҫын патӗнче ҫав каҫ 28 ҫулти ҫамрӑк хӑнара пулнӑ. Ӳсӗр арҫын хӑнана хӗнеме тапранса кайнӑ. Вӑл ӑна пуҫӗнчен ҫапса пӗтернӗ. Йывӑр суранланса пӗтнӗ ҫамрӑк арҫын вырӑнтах вилсе кайнӑ.
28 ҫулти арҫын вилнӗ хыҫҫӑн тӗпчевҫӗсем РФ Пуҫиле кодексӗн 111-мӗш статйин 4-мӗш пайӗпе килӗшӳллӗн пуҫиле ӗҫ пуҫарнӑ. Хӗнекеннине тытса чарнӑ.
Шупашкар хулинче нумай хваттерлӗ ҫуртсенчен пӗринчи подъезда наркотик хума пынӑ ҫамрӑка тытса чарнӑ.
Миттов бульварӗнчи ҫав ҫуртра кӑрлачӑн 9-мӗшӗнче пакунлисем ҫав самантра урӑх преступление уҫса парассипе ӗҫленӗ. Картлашкапа утса хӑваракан ҫамрӑкран вӗсем мӗн те пулин пӗлмест-и тесе ыйтса пӗлес тенӗ. Анчах лешӗ ним те чӗнмен, чупса тарма тӑнӑ.
Каччӑ ҫав ҫуртри подъёзда наркотик хурса хӑварма пынӑ иккен. Ун ҫумӗнче марихуна пулнӑ. 3,6 грамм ытларах.
Асӑннӑ каччӑ малтан та ҫавӑн пек хӑтланнӑ иккен, ирӗке тухсан вӑл каллех унчченхи мелпех укҫа ӗҫлесе илес тенӗ. Халӗ ун тӗлӗшпе каллех пуҫиле ӗҫ пуҫарнӑ.
Раштав уйӑхӗн 3-мӗшӗнче «Шупашкар—Сурски» автоҫул ҫинче, Пӑрачкав ҫывӑхӗнче, автобус ҫаврӑнса ӳкнине Чӑваш халӑх сайчӗ пӗлтернӗччӗ.
Автобусра ларса пынӑ ҫынсенчен 27-шне (вӗсем Чулхуларан) облаҫри клиника пульницине илсе кайнӑ Унсӑр пуҫне тепӗр икӗ ҫын хӑй тӗллӗн тухтӑрсенчен пулӑшу ыйтнӑ. Аманнӑ тепӗр 24 ҫын килте сипленет.
Чӑваш Енӗн Сывлӑх сыхлав министерствинче пӗлтернӗ тӑрӑх, 29 ҫын аманнӑ, ҫав шутран 13 ҫын йывӑр аманнӑ, 14-ӑн — ҫӑмӑл. 2 ҫын, Чӑваш халӑх сайчӗ ун пирки хыпарланӑччӗ ӗнтӗ, вилмеллех аманнӑ.
Автобус рулӗ умӗнче пулнӑ 61 ҫулти водитель тӗлӗшпе пуҫиле ӗҫ пуҫарнӑ.
Чӑваш Ен Элтеперӗ Олег Николаев тӳре-шарана арестленине пӳрне касса янипе танлаштарнӑ. Кунта сӑмах республикӑн транспорт министрӗ Владимир Осипов тата Ҫӗнӗ Шупашкар хула администрацийӗн пуҫлӑхӗ Дмитрий Пулатов пирки пырать.
«Ыраттарать, анчах вӗлермест», — ҫапларах хак панӑ тӳре-шарапа ҫыхӑннӑ пӑтӑрмаха республика ертӳҫи. Олег Николаев шухӑшланӑ тӑрӑх, тахӑш самантра вӑл тимлӗхе ҫухатса тӳре-шарана шаннӑ.
Тӗпчевҫӗсем шухӑшланӑ тӑрӑх, Пулатов ӗҫ вырӑнӗпе ытлашши усӑ курнӑ, усламҫӑ ӗҫӗпе аппаланнӑ, Осипов ӗҫ вырӑнӗпе хӑйӗншӗн усӑ курнӑ, тӳлес ӗҫре йӗркене пӑснӑ.
-10.7 °C